काठमाडौँ । नेपाल कम्युनिष्ट पार्टी (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले गणतन्त्र संस्थागत गर्नमा डा गोविन्दबहादुर थापाले अहम् भूमिका निर्वाह गर्नुभएको बताउनुभएको छ ।
स्व. डा गोविन्दबहादुर थापा स्मृति प्रतिष्ठान काठमाडौँले आज आयोजना डा गोविन्दबहादुर थापा स्मारिका लोकार्पण समारोहमा उहाँले भन्नुभयो, “स्वर्गीय डा थापाले विभिन्न पुस्तक, लेख, रचनामार्फत गणतन्त्रलाई सकारात्मक दिशामा लैजान सकारात्मक भूमिका निर्वाह गर्नुभएको छ, जो हाम्रा लागि अविस्मरणीय छन् ।”
अध्यक्ष नेपालले डा थापाको अर्थतन्त्रलाई विश्लेषण गर्ने दृष्टिकोण फरक रहेको बताउनुभयो । सबै युवालाई आवश्यक पर्ने, अर्थतन्त्र बलियो हुने खालका योजनाहरु अघि बढाउन आजको आवश्यकक्ता रहेको उहाँको भनाइ थियो ।
नेपाल कम्युनिष्ट पार्टी (एमाले)का उपाध्यक्ष एवं पूर्वअर्थमन्त्री सुरेन्द्र पाण्डेले डा थापाको उमेरमा पनि पनि जोसिलो, युवा चरित्र भएको र केही गर्नुपर्छ भन्ने स्वभाव भएको व्यक्ति भएको बताउनुभयो । उहाँले भन्नुभयो, “म अर्थमन्त्री हुँदा डा थापा सल्लाहकार टिममा पनि हुनुहुन्थ्यो । मैले नै उहाँलाई एसियाली विकास बैङ्क (एडिबी) मा वैकल्पिक कार्यकारी निर्देशकका रुपमा पठाउन सिफारिस गरेको थिएँ ।”
पूर्वअर्थमन्त्री युवराज खतिवडाले डा थापा अर्थतन्त्रमा मात्र नभई राजनीति र कलासाहित्यमा पनि उत्तिकै रुचि राख्ने व्यक्ति भएको स्मरण गर्नुभयो । कार्यक्रमको समापन गर्दै स्व थापाकी श्रीमती तथा डा गोविन्दबहादुर थापा स्मृति प्रतिष्ठानकी अध्यक्ष इन्दिरा थापाले अर्थशास्त्री स्व डा गोविन्दबहादुर थापा देशका लागि आवश्यक पर्ने एक प्रखर लेखक हुनुभएको बताउनुभयो ।
अर्थविद् स्व थापाद्वारा विभिन्न समयमा लिखित लेखरचनाहरुको सङ्ग्रह गरी बनाइएको पुस्तकको डा गोविन्दबहादुर थापा स्मारिकाको आज सो स्मृति प्रतिष्ठानकी अध्यक्ष इन्दिरा थापा, नेकपा (एकीकृत समाजवादी) का अध्यक्ष माधवकुमार नेपाल, पूर्वअर्थमन्त्री सुरेन्द्र पाण्डे, पूर्वअर्थमन्त्री युवराज खतिवडालगायतले सार्वजनिक गर्नुभएको थियो ।
एसियाली विकास बैङ्क (एडिबी) मुख्यालय फिलिपिन्समा पनि काम गरेका डा थापाको विसं २०७८ मा काठमाडौँको बाँसबारीस्थित गङ्गालाल राष्ट्रिय हृदयरोग केन्द्रमा कोभिड–१९ सङ्क्रमितको उपचारका क्रममा निधन भएको थियो ।
