काठमाडाैँ । गोकर्णेश्वर नगरपालिका–१, बाटुलेचौरमा अवस्थित श्री राम जानकी आधारभूत विद्यालयमा सूचना तथा प्रविधि (आइटीसी) प्रयोगशाला कक्षाको औपचारिक उद्घाटन सम्पन्न भएको छ। गोकर्णेश्वर नगरपालिकाको आर्थिक सहयोगमा निर्माण गरिएको उक्त प्रयोगशालाको उद्घाटनसँगै विद्यार्थीहरूलाई विद्यालय पोशाक समेत वितरण गरिएको हाे।
विद्यालय प्रशासनका अनुसार कार्यक्रमको प्रमुख उद्देश्य प्रविधिमैत्री शिक्षा प्रवाह गर्दै डिजिटल शिक्षाको पहुँच विस्तार गर्नु रहेको थियो । उद्घाटन समारोहमा गोकर्णेश्वर नगरपालिकाका नगरप्रमुख श्री दिपक कुमार रिसाल प्रमुख अतिथिका रूपमा, नगर उपप्रमुख श्रीमती सान्नानी लामा विशेष अतिथिका रूपमा तथा शिक्षा शाखा प्रमुख श्री वीर बहादुर खड्का लगायत जनप्रतिनिधिहरू, विद्यालय व्यवस्थापन समिति, शिक्षक–अभिभावक संघ, अभिभावक तथा स्थानीय समुदायको उल्लेखनीय उपस्थिति रहेको थियो।
कार्यक्रमले प्रविधिमा आधारित शिक्षाको विकासमा गोकर्णेश्वर नगरपालिकाको प्रतिबद्धता र सहकार्यको स्पष्ट उदाहरण प्रस्तुत गरेको छ ।
