गण्डकी । पोखरामा नयाँ मौलिक नाटक ‘सपना डिलक्स कोच’ मञ्चन हुने भएको छ । यही माघ ११ गतेदेखि मञ्चन सुरु हुने नाटकको पूर्वाभ्यास पोखराको नदीपुरस्थित निर्माणाधीन हंसध्वनि नाटकघरमा भइरहेको छ ।
नाटकको प्रदर्शन इन्द्रेणी थिएटरले गर्ने थिएटरका अध्यक्ष केदारनाथ पौडेलले जानकारी दिनुभयो । इन्द्रेणीको छैटौँ प्रस्तुतिका रूपमा निर्माण हुन लागेको नाटकको लेखन केदारनाथ पौडेलले गर्नुभएको छ । नाटकमा पोखराबाट काठमाडौँ जाने यात्रुबाहक बसमा हुने विभिन्न क्रिया र प्रतिक्रियालाई समेटिएको जनाइएको छ ।
एउटा परिवारले सामान्य हिसाबले कसरी गाडी चलाएर जीविकोपार्जन गरिरहेको छ र त्योभित्र कस्ता समस्या छन् भन्नेबारे नाटकमा चित्रण गर्न खोजिएको लेखक पौडेलले जानकारी दिनुभयो । पोखराबाट काठमाडौँ जाने क्रममा देखिएका दृष्यलाई मञ्चमा उतार्न लागिएको उहाँले बताउनुभयो । “सबै मानिस बस चढेर गन्तव्यमा जाने गरे पनि यसरी गन्तव्यमा पु¥याउने बस र कामदारले भोग्ने समस्याबारे यात्रुले खासै ध्यान दिँदैनन् । त्यही कुरा नाटकमार्फत बाहिर ल्याउन लागिएको छ”, पौडेलले भन्नुभयो ।
यसमा कथा शैलीमा फरक रूपमा प्रस्तुत गर्ने प्रयास गरिएको र गाउँघरमा धेरैले भोगेको बाँदर आतङ्कलाईसमेत जोडिएकाले दर्शकलाई मनोरञ्जन मिल्ने उहाँले विश्वास व्यक्त गर्नुभयो ।
नाटकमा कपिल शर्मा, दिलप्रसाद गुरुङ, विभुप्रसाद भुसाल, उमा पुन, रामहरि अधिकारी, विजयराज अधिकारी, अभिषेक भुसाल, श्रद्धा अधिकारीलगायत कलाकारको अभिनय हेर्न पाइनेछ ।
नाटकलाई सुन्दर बनाउन कलाकार र नेपथ्यबाट विभिन्न प्रयास भइरहेको निर्देशक लक्ष्मण डुम्रेले बताउनुभयो ।
