काठमाडौँ । पाशुपत क्षेत्रमा गाईजात्रा, खड्गजात्रा र रोपाइँजात्रा सम्पन्न भएको छ । गत आइतबार गाईजात्रा, साेमबार खड्ग जात्रा र तेस्रो दिन मङ्गलबार रोपाइँजात्रा सम्पन्न भएकाे हाे ।
पशुपति क्षेत्रस्थितका विभिन्न स्थानबाट निकालिने जात्राहरू पाशुपति क्षेत्रबाट इट्टापाखा, जयवागेश्वरी मन्दिर परिसर, नवाली टाेल हुदैँ ताम्रेश्वर महादेव मन्दिर परिक्रमा गरी पुन: नवाली टाेल, जयवागेश्वरी मन्दिर, दथु टाेल हुँदै पशुपतिनाथ मन्दिर परिक्रमा पछि पुन: जात्रा निकालिएकाे ठाउँमा पुगेर समापन हुने गर्दछ ।
प्रत्येक वर्ष पशुपति क्षेत्रमा भाद्र कृष्ण प्रतिपदाका दिन गाईजात्रा, द्बितियाकाे दिन खड्गजात्रा र तृतीयाका दिन रोपाइँजात्रा जात्रा हुने गरेको छ । गाईजात्रामा लाखे र बाजा सहित एक वर्षभित्र दिवङ्गत भएका आफन्तको सम्झनामा आजका दिन गाई वा मानिसलाई गाईका रूपमा सिँगारी आ–आफ्ना क्षेत्रमा परिक्रमा गराउने गरिन्छ । यसरी नगरपरिक्रमा गर्नाले वर्षभरि मृत्यु भएका व्यक्तिहरू गाईको पुच्छर समाई वैतरणी पार हुन्छन् भन्ने धार्मिक विश्वास छ ।
त्यस्तै खड्ग जात्रामा हातमा खड्ग लिइ लाखे सहित नगर परिक्रमा गर्ने प्रचलन रहि आएकाे छ र याे जात्रा पाशुपत क्षेत्रमा मात्रै हुने गरेकाे छ । साेहि दिन अन्य स्थानहरूमा रोपाइँ जात्रा मनाइन्छ ।
त्यस्तै, तेस्राे दिन रोपाइँ जात्रा मनाउने प्रचलन रहिँ आएकाे छ । पुरुषले महिलाको भेष धारण गरी खेतालालाई खाजा बाँडेको अभिनय गरिने यो जात्रा हेर्न पशुपति क्षेत्रमा मानिसको घुइँचो हुने गरेको छ ।
यस दिन लोग्ने मानिस एवं केटाकेटीले देउपाटन क्षेत्रमा रोपाइँ गरेको अभिनय गर्दै जात्रा गर्ने गरेको पशुपति क्षेत्र विकास कोषअन्तर्गत अमालकोट कचहरीका कार्यालयका द्वारे रामकृष्ण डङ्गोलले बताउनुभयाे ।
घोडचढी मानिसले जात्रामा रौनकता थप्ने गरेका छन् । यो जात्रामा परम्परागत कृषि जीवनको झल्को पाइन्छ ।
