काठमाडौँ । काठमाडौँ महानगरपालिका वडा ८ पशुपतिनाथ क्षेत्रमा रहेको दाफा भजन फल्चाको समुद्घाटन गरिएको छ ।
आज आयोजित एक समारोहका बिच काठमाडौँ महानगरपालिकाका सम्पदा तथा पर्यटन समिति संयोजक एवं वडा ८ का वडाअध्यक्ष आशामान संगतले फल्चाको समुद्घाटन गर्नुभएको हो ।
समुद्घाटन पछि बोल्दै वडा अध्यक्ष आशामान संगतले, ' भकुंंत्वा उपभोक्ता समितिको विशेष पहलमा पशुपति देवपत्तनस्थित भकुंत्वामा रहेको दाफा भजन फल्चा १८औँ शताब्दीमा श्री सिद्धि नरसिंह डंगोलद्वारा निर्माण गरिएको दफा भजन फल्चा: पूर्ण रूपमा जिर्ण भई हाल काठमाडौँ महानगरपालिकाको आर्थिक सहयोगमा पुनर्निर्माण गरी समुद्घाटन गरिएको उहाँले बताउनुभयो ।
उहाँले, पशुपति क्षेत्र विकास कोषले यस फल्चालाई हटाउन धेरै प्रयास गरेता पनि यसको ऐतिहासिकता कायम राख्नका लागि आफुरूले भत्काउन नदिएको र त्यस पश्चात् अर्को भवन सर्न ताकेता गरेर दुख दिएपनि अन्ततह: फल्चाको पुनः निर्माण कार्य सम्पन्न गरिएको उहाँले बताउनुभयो । उक्त भवन २१ लाख हाराहारी रकममा निर्माण भएको उहाँले बताउनुभयो ।
त्यस्तै, दाफा भजन फल्चा पुनः निर्माण गरेको भकुंंत्वा उपभोक्ता समितिका अध्यक्ष भाई राजा डंगोलले परम्परागत शैलीमा पाशुपत क्षेत्रमा रहेको भवनको पुन:निर्माण गरि समुद्घाटन गर्न पाएकोमा वडा अध्यक्ष लगायत सम्पूर्णलाई धन्यवाद व्यक्त गर्नुभयो ।
उहाँले, १८औँ शताब्दीमा श्री सिद्धि नरसिंह डंगोलद्वारा निर्माण गरिएको दफा भजन फल्चा पूर्ण रूपमा जिर्ण रहेकाले काठमाडौँ महानगरपालिका वडा ८ का वडाअध्यक्ष सहितको टोलीलाई यस बारे जानकारी गराइएको र उहाँहरूको पहलमा फल्चा समुद्घाटन गरिएको उहाँले बताउनुभयो ।
काठमाडौँ महानगरपालिका विभिन्न फल्चा, कुवाँ, इनार, डवली लगायतका परम्परागत संस्कृतिक, ऐतिहासिकता बोकेको सहरका रूपमा चिनिन्छ ।
