काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले उपभोक्ता अदालतले स्थापना भएको एक वर्षको अवधिमा थोरै भएपनि महत्वपूर्ण काम गरेको बताएकी छन् । उपभोक्ता अदालतको स्थापना दिवसको अवसरमा आयोजित शुभकामना आदानप्रदान कार्यक्रममा बोल्दै उनले उपभोक्ता भनेको वस्तु खरिद गर्ने व्यक्ति मात्र नभई सचेत नागरिकको संकेत भएको उल्लेख गरिन् । उनले समाजका सबै मानिस उपभोक्ता हुने भन्दै उत्पादकसमेत उपभोक्ता नै हुने धारणा व्यक्त गरिन् ।
उनले, ‘उपभोक्ता अदालतले यो एक वर्षको समयमा थोरै तर महत्वपूर्ण काम गरेको छ । उपभोक्ता भन्ने वित्तिकै वस्तु खरिद गर्ने व्यक्ति मात्र होइन । उपभोक्ता भनेको सचेत नागरिकको संकेत हो जस्तो लाग्छ । उपभोक्ता को भनेर हामीले प्रश्न नै गर्नु पर्दैन । सबैजना उपभोक्ता हौं । जो उत्पादक हुनुहुन्छ उहाँहरु पनि उपभोक्ता हो ।’
‘उपभोक्ताको अधिकारको कुरा गरिरहँदा अरु कोही बाहिरको व्यक्ति, बाहिरको मान्छे कसैको अधिकारको कुरा गरेका होइनौं, हामी सबै आफ्नो अधिकारको कुरा गरिरहेका छौं । उपभोक्ताको अधिकारको कुरा गर्दा हामीले उपभोक्ता अदालत सुरु गर्नुपर्ने किन भयो भन्दाखेरि व्यापार, व्यवसाय, बजार जुन हिसावले अनुशासित हुनुपर्ने हो त्यो हिसावले अनुशासित छैन । त्यो अनुशासित बनाउनको लागि कानुन चाहिन्छ र सँगसँगै दण्ड दिनुपर्ने ठाउँमा दिनु नि पर्छ भनेर पनि यो कानुनहरु बनेको हो,’ उनले भनिन् ।
