काठमाडौँ । अमेरिकी राष्ट्रपति डोनाल ट्रम्पले इरानमाथि हुने भनिएको आक्रमण दुई साताका लागि स्थगित गर्ने घोषणा गरेका छन्। पाकिस्तानका प्रधानमन्त्री शहबाज शरीफ र सेनाप्रमुख आसिम मुनीर सँगको छलफलपछि यस्तो निर्णय लिइएको उनले बताएका छन्।
राष्ट्रपति ट्रम्पका अनुसार पाकिस्तान पक्षले इरानमाथि हुने आक्रमण रोक्न आग्रह गरेको थियो। सो आग्रहलाई ध्यानमा राख्दै र इरानले हर्मुज जलडमरू सुरक्षित, पूर्ण र तत्काल खोल्न सहमत हुने सर्तमा दुई पक्षीय युद्धविराम लागू गरिने बताएका छन् ।
ट्रम्पले अमेरिकाले आफ्नो सैन्य उद्देश्यहरू पूरा गरिसकेको दाबी गर्दै अब दीर्घकालीन शान्ति सम्झौतामा पुग्ने चरणमा रहेको बताएका छन्। उनका अनुसार इरानबाट प्राप्त १० बुँदे प्रस्ताव वार्ताका लागि उपयुक्त आधार भएको र अधिकांश विवादका विषयमा सहमति नजिक पुगेको छ।
उनले आगामी दुई साताभित्र अमेरिका र इरानबीच दीर्घकालीन शान्ति सम्झौता टुंगिने विश्वास व्यक्त गरेका छन्। साथै, मध्यपूर्वमा स्थायी शान्ति स्थापना गर्ने दिशामा यो महत्वपूर्ण कदम हुने उनले उल्लेख गरेका छन्।
