विराटनगर । प्रतिनिधिसभा निर्वाचन २०८२ अन्तर्गत कोशी प्रदेशका जिल्लाहरूबाट प्रतिनिधित्व गर्ने २८ जना नयाँ सांसदको टुंगो लागेको छ । प्रदेशका १४ वटै जिल्लाका २८ निर्वाचन क्षेत्रमा प्रत्यक्षतर्फको मतगणना सम्पन्न भएसँगै नयाँ माननीयहरूको टुंगो लागेको हो ।
निर्वाचित २८ सांसदमध्ये राष्ट्रिय स्वतन्त्र पार्टी अग्रस्थानमा रहेको छ । उसले एक्लैले १७ सीट जितेको छ । त्यसैगरी नेपाली कांग्रेस र नेकपा एमालेले समान ४–४ सीट जितेका छन् भने श्रम संस्कृति पार्टीले ३ स्थानमा विजय हासिल गरेको छ । अन्य दलका कुनै पनि उम्मेदवार कोशी प्रदेशबाट निर्वाचित हुन सकेनन् ।
झापा जिल्लामा राष्ट्रिय स्वतन्त्र पार्टीले क्लिन स्विप गरेको छ । बालेन्द्र शाह (बालेन) झापा क्षेत्र नं. ५ बाट एमाले अध्यक्ष केपी शर्मा ओलीलाई फराकिलो मतान्तरले पराजित गर्दै सांसद बन्न सफल भए । शाहले ६८ हजार ३४८ मत पाउँदा दोस्रो स्थानमा रहेका एमाले अध्यक्ष केपी शर्मा ओलीले १८ हजार ७३४ मत मात्रै पाए ।
निरन्तर यही क्षेत्रबाट चुनाव जित्दै आएका ओलीलाई शाहले यसपटक नराम्रो हार चखाएका हुन् । ३६ वर्षीय बालेन्द्र शाह पेशाले इन्जिनियर भए पनि केही वर्षअघिसम्म नयाँ पुस्तामाझ ¥यापरका रूपमा परिचित छन् । उनी २०७९ सालमा काठमाडौं महानगरपालिकाको मेयरमा निर्वाचित भएपछि राष्ट्रिय चर्चाको केन्द्रमा पुगेका हुन् ।
मेयरमा विजयी भएसँगै बालेनले भर्चुअल संसारमा बनेको लोकप्रियतालाई वास्तविक भूगोलसम्म विस्तार गर्न सफल भए । सामाजिक सञ्जालमार्फत स्थापित भएको उनको छवि राजनीतिक नेतृत्वसँग जोडिँदै अझ व्यापक बनेको हो ।
२०७२ सालको महाभूकम्पपछि उद्धार तथा राहत कार्यमा सक्रिय सहभागिता जनाउँदै उनले समाजसेवीको छवि पनि बनाएका थिए । युवामाझ लोकप्रिय रहेका बालेन्द्र शाह नै राष्ट्रिय स्वतन्त्र पार्टीले अर्को कुनै निर्णय नगरेमा अबको प्रधानमन्त्री बन्ने छन् ।
झापाकै क्षेत्र नं.४मा राष्ट्रिय स्वतन्त्र पार्टीबाट निर्वाचित भएका शम्भु प्रसाद ढकालले ४३ हजार ६३१ मत पाए । उनका निकटतम प्रतिस्पर्धी बनेका नेकपा (एमाले) का लाल प्रसाद साँवा लिम्बूले ११ हजार ९८६ मत पाए । २०७९ सालको निर्वाचन भने लिम्बूले नै जितेका थिए ।
क्षेत्र नं. ३मा राष्ट्रिय स्वतन्त्र पार्टीका प्रकाश पाठक ३८ हजार ६७४ मतसहित निर्वाचित भए । उनले राष्ट्रिय प्रजातन्त्र पार्टीका अध्यक्ष समेत रहेका राजेन्द्र प्रसाद लिङ्देनलाई पराजित गरेका हुन् ।
६ वटा निर्वाचन क्षेत्र रहेको मोरङ जिल्ला पनि रास्वपाले क्लिन स्विप गरेको छ । कांग्रेसका वरिष्ठ नेता डा. शेखर कोइरालादेखि चर्चामा रहेका डा. सुनिल शर्मासम्मले यहाँबाट हार व्यहोर्नुप-यो । मोरङबाट कांग्रेसका महामन्त्री समेत पराजित भएका छन् ।
क्षेत्र नं. ६ मा रास्वपाकी उम्मेदवार रुविना आचार्य निर्वाचित भइन् । आचार्यले ५५ हजार ५१३ मत पाउँदा निकटतम प्रतिस्पर्धी बनेका कांग्रेसका डा. शेखर कोइरालाले १२ हजार ८५० मत मात्रै पाए । कोइराला २०७९ सालको निर्वाचनमा भने विजयी भएका थिए ।
क्षेत्र नं. ५ मा राष्ट्रिय स्वतन्त्र पार्टीकी आशा झाले ३० हजार ४३४ मतसहित विजय हासिल गरिन् । उनको निकटतम प्रतिस्पर्धी बनेका नेपाली कांग्रेसका फुल कुमार लालवानीले ९ हजार ४१५ मत पाए । यसअघि यो क्षेत्र स्वतन्त्र उम्मेदवार रहेका योगेन्द्र मण्डलले जितेका थिए ।
क्षेत्र नं. ४ मा कांग्रेसका महामन्त्री गुरुराज घिमिरे रास्वपाका सन्तोष राजवंशीसँग पराजित भए । राजवंशीले ४० हजार ८३३ मत ल्याएर निर्वाचन जित्दा निकटतम प्रतिस्पर्धी बनेका कांग्रेसका गुरुराज घिमिरेले १२ हजार ८१८ मत पाएका छन् । यो क्षेत्र २०७९ को निर्वाचनमा नेकपाका अमनलाल मोदीले जितेका थिए ।
क्षेत्र नं. ३ कांग्रेस नेता डा. सुनिल शर्माको पकडको क्षेत्र मानिन्थ्यो । तर यहाँ पनि रास्वपाका उम्मेदवार गणेश कार्कीले विजय हासिल गरे । कार्कीले ३६ हजार ९२४ मत प्राप्त गर्दा निकटतम प्रतिस्पर्धी बनेका शर्माले २४ हजार ३५४ मत पाए ।
चार निर्वाचन क्षेत्र रहेको सुनसरीमा पनि कांग्रेस एमाले बढारिएका छन् । यहाँ तीन क्षेत्र रास्वपाले जित्दा एकमा श्रम संस्कृति पार्टीले जित हाँसिल गरेको छ ।
क्षेत्र नं. २ मा राष्ट्रिय स्वतन्त्र पार्टीका लाल बिक्रम थापा निर्वाचित भए । उनले कांग्रेसका राजीव कोइरालासहितलाई पराजीत गर्दै संसदमा यात्रा सुनिस्चित गरेका हुन् । थापाले ५७ हजार ३४८ मत ल्याउँदा निकटतम प्रतिस्पर्धी बनेका नेपाली कांग्रेसका राजीव कोइरालाले १६ हजार ७१ मत प्राप्त गरे ।
यहाँ अघिल्लो निर्वाचनमा कांग्रेसका डा.नारायण खड्का निर्वाचित भएका थिए ।
तत्कालीन माओवादी केन्द्रका उम्मद्वार सुदन किँरातिले २०७९ को निर्वाचन जितेको भोजपुर जिल्ला भने यो पटक श्रम संस्कृति पार्टीका धु्रबराज राईले बाजी मारेका छन् । राईले १६ हजार ६६३ मत पाउँदा निकटतम बनेका नेकपा (एमाले)का शेरधन राईले भने १४ हजार ७५० मत पाएका छन् ।
तत्कालीन माओवादी केन्द्रका उम्मद्वार नै रहेका रामकुमार राईले २०७९ को निर्वाचन जितेको खोटाङ जिल्लामा पनि यो निर्वाचनमा श्रम संस्कृति पार्टीका उम्मेदवारले विजय हाँसिल गरेका छन् ।
सो पार्टीका उम्मेदवार आरेन राईले १६ हजार ६१२ मतसहित निर्वाचन जित्दा नेकपा एमालेका देव विक्रम राई १२ हजार ७१४ मतका साथ दोश्रो भए ।
तेह्रथुम जिल्लामा भने नेपाली कांग्रेसले २०७९ को निर्वाचनमा जितेको साख जोगाएको छ । कांग्रेस नेतृ सीता गुरुङले जितेको यो जिल्लामा यो पटक पनि कांग्रेसकै उम्मेदवार सन्तोष सुब्बा निर्वाचित भएका छन् ।
यो जिल्ला एसअघि पनि नेकपा एमालेले नै जितेको जिल्ला हो । एमालेका उपमहासचिव योगेश भट्टराईले अघिल्लो निर्वाचन जितेका थिए ।
