काठमाडौं । फागुन २१ (भोली)हुने प्रतिनिधि सभा सदस्य निर्वाचनको तयारी अन्तिम चरणमा रहेको रत्नराज्य स्कूल मतदान केन्द्र ‘ख’ को मतदान अधिकृत सुशील आचार्यले जानकारी दिएका छन् ।
काठमाडौं क्षेत्र - १ को मतदान केन्द्र रहेको रत्नराज्य मतदान केन्द्र ‘ख’ को मतदान स्थलमा बुथ निर्माणको कार्य भइरहेको बताएका हुन् । उनका अनुसार निर्वाचन आचारसंहिताअनुसार शान्ति भंग नगर्ने, मदिरा बिक्री वितरणमा रोक लगाउने तथा निषेधित क्षेत्र सम्बन्धी मुचुल्का ४८ घण्टा अगावै टाँसिसकिएको छ ।
‘हामीले अस्तीदेखि चार–पाँच वटा मुचुल्का टाँस्नुपर्ने थियो । ती सबै प्रक्रिया पूरा गरिसकेका छौँ,’ उनले भने ।
यसैगरी, हिजो राजनीतिक दलका प्रतिनिधि तथा उम्मेदवारका प्रतिनिधिहरूसँग सर्वदलीय बैठक गरी आवश्यक निर्णयहरू समेत गरिएको उनले जानकारी दिए । मतदान केन्द्रमा बुथ निर्माणको कार्य भइरहेको र त्यसपछि भोलिको मतदानका लागि सम्पूर्ण तयारी पूरा गरिने मतदान अधिकृत आचार्यले बताए ।
