ललितपुर । ललितपुर महानगरपालिकाका प्रमुख चिरीबाबु महर्जनले पूर्वाधारसँगै स्वास्थ्य, शिक्षा र खेलकुदको विकासलाई प्राथमिकतामा राखेको बताउनुभएको छ ।
ललितपुर जिल्ला टेबल टेनिस सङ्घको संयोजन तथा ललितपुर महानगरपालिका–९ को आयोजनामा महानगरको अन्तरवडास्तरीय टेबल टेनिस प्रतियोगिताको आज भएको उद्घाटन गर्दै महानगर प्रमुख महर्जनले २०७३ सालमा उपमहानगरपालिकामा समाहित भएर महानगरका वडा बनेका खोकना, बुङगमती, हरिसिद्धि, धापाखेल, सुनाकोठीलगायत क्षेत्रको विकासमा ध्यान दिएको बताउनुभयो ।
“मेयर कप प्रतियोगिता भव्यताका साथ सम्पन्न हुनु महत्त्वपूर्ण छ, खेलकुद क्षेत्रमा यस प्रतियोगिताका कारणले उत्कृष्टता हासिल गर्नेछ, धेरै प्रतिभावान खेलाडीले अवसर प्राप्त गर्नेछन्,” उहाँले भन्नुभयो । प्रमुख महर्जनले ललितपुरलाई सुन्दर र बस्नयोग्य सहरका रूपमा विकास गर्छौं भन्नुभयो ।
ललितपुर महानगरपालिकाका प्रवक्ता एवं वडा ९ का अध्यक्ष राजु महर्जनले छ दिनसम्म हुने यस प्रतियोगिताले खेलाडीको प्रतिभाको उजागर गर्ने विश्वास व्यक्त गर्नुभयो ।
ललितपुर जिल्ला टेबल टेनिस सङ्घका अध्यक्ष आशिष अवालेले खेलकुदको उत्सवले समुदायको उत्साह र एकतालाई उचाइमा पुर्याउने विश्वास व्यक्त गर्नुभयो । प्रतियोगिताका संयोजक सञ्जु अवालेले प्रतिभावान नयाँ खेलाडीलाई प्रोत्साहन गर्ने अभिप्रायले आयोजित यस प्रतियोगितामा महानगरका २४ वटा वडाका ६ सय ३७ जना खेलाडी सहभागी भएर १६ विधामा प्रतिस्पर्धा हुने जानकारी गराउनुभयो । आजदेखि सुरूभएको प्रतियोगिता पुस १५ गतेसम्म सञ्चालन हुनेछ ।
