काठमाडौँ । काठमाडौँ उपत्यकाका मुख्य चोकहरूमा युवाले स्वस्फूर्त रूपमा सडकमा उभिएर स्वयंसेवकका रूपमा ट्राफिक व्यवस्थापनमा अग्रसरता देखाएका छन् । ‘जेन-जी पुस्ता’को आन्दोलनका कारण अझैसम्म ट्राफिक प्रहरीले नियमित रूपमा काम गर्न सकेका छैनन् ।
कर्फ्यू हटेपछि सेना ब्यारेक फर्किए पनि ट्राफिक व्यवस्थापनमा समसइा देखिएको छ । एकातिर धेरै ठाउँमा ‘ट्राफिक सिग्नल’ बिग्रिएका छन् भने अर्कोतर्फ प्रहरीको उपस्थिति नदेखिँदा राजधानीका चोकहरूमा थप समस्या भएको छ । यस्तै अवस्थामा स्थानीय स्वयंसेवकले स्वस्फूर्त रूपमा सडकमा उभिएर सवारीसाधन र पैदल यातायातलाई सहज बनाउन सहयोग गरिरहेका छन् ।
स्वयंसेवक ललित ओझाले भन्नुभयो, “राजधानी जामले थिचिँदा नागरिक नै सहयोग गर्न निस्कनुपर्ने अवस्था आएको छ । प्रहरी नभएकाले हामीले सडक खाली राख्ने प्रयास गरिरहेका छौँ ।”
त्यस्तै, रोशनी खड्काले भन्नुभयो, “प्रहरी नभए पनि सवारीचालक र पैदल यात्रु सहयोगी बने भने ठूलो समस्या हुँदैन । तर दीर्घकालीन रूपमा राज्यले नै जिम्मेवारी लिनुपर्छ ।”
सर्वसाधारण भोजराज पाण्डेले भन्नुभयो, “ट्राफिक सिग्नल बिग्रिएका छन्, प्रहरी छैनन् । यस्तो अवस्थामा नागरिककै सहयोगले सडक चलिरहेको छ । तर यसलाई सामान्य ठान्न मिल्दैन, राज्यले तुरुन्त समाधान निकाल्नुपर्छ ।”
राजधानीका विभिन्न चोकमा स्वयंसेवकको सक्रियता देखिन थालेको छ । तर दीर्घकालीन समाधानका लागि प्रहरी प्रशासन र सरकारले चाँडो पहल गर्नुपर्ने अवस्था छ ।
