काठमाडौँ । उद्यमी तथा साहित्यकार वसन्त चौधरीले समाजका विभिन्न क्षेत्रका व्यक्तित्वसँग अन्तर्वार्ता गरी युट्यब च्यानलमार्फत ‘मनका कुरा विथ वसन्त चौधरी’ श्रव्यदृश्य कार्यक्रम सञ्चालन गर्नुहुने भएको छ ।
सिजी इन्टरटेन्मेन्टद्वारा भोलि शुक्रबारदेखि उक्त श्रब्यदृश्य कार्यक्रम प्रसारण गरिने उक्त इन्टरटेनमेन्टका सहअध्यक्ष एवं वरिष्ठ कलाकार हरिहर शर्माले आज आज यहाँ पत्रकार सम्मेलन गरी जानकारी दिनुभयो । उहाँका अनुुसार भोलि शुक्रबारदेखि सिजी इन्टरटेनमेन्ट युट्युब च्यानलमा हरेक शुक्रबार राति ८ बजे उक्त कार्यक्रम प्रसारण हुनेछ ।
उक्त कार्यक्रममा वसन्त चौधरीका भोगाइ र सफलताका कुराबाहेक जीवन र जगत्बाट सिकेका र अनुभूत गरेका भोगाइ र उहाँका सिर्जनाका साथै समाजका विभिन्न क्षेत्रमा लागेर ख्याति कमाएका र सङ्घर्षशील जीवन यापन गरी समाजमा उदाहरणीय बनेका व्यक्तित्वका अनुभूति र कार्यपद्धतिलाई समेटिने पत्रकार सम्मेलनमा वरिष्ठ कलाकार शर्माले जानकारी दिनुभयो ।
कार्यक्रमका हरेक शृङ्खलामा ती व्यक्तित्वलाई ल्याएर उनीहरुको सङ्घर्ष तथा जीवन यात्राका आरोह–अवरोह पस्किने र यसबाट समाजमा सकारात्मक काम तथा जीवनमा प्रगतिका लागि प्रेरणा प्रदान गर्न सकिने सो कार्यक्रमको लक्ष्य रहेको शर्माले बताउनुभयो । उद्योगी व्यवसायी चौधरी व्यवसायका साथै साहित्यकर्ममा पनि हुनुहुन्छ ।
