काठमाडौँ । सर्वोच्च अदालतको प्रधानन्यायाधीश नियुक्तिमा यसपटक लामो समयदेखि कायम वरिष्ठताको परम्परा तोडिएको छ । संवैधानिक परिषद्ले वरिष्ठतम न्यायाधीशलाई छाड्दै चौथो वरीयताका न्यायाधीश डा. मनोज शर्मालाई नयाँ प्रधानन्यायाधीशका रूपमा सिफारिस गरेको हो ।
बिहीबार बसेको परिषद् बैठकले शर्माको नाम अनुमोदनका लागि अघि बढाएको हो ।यसअघि न्याय परिषद्ले भावी प्रधानन्यायाधीश नियुक्तिका लागि ६ जना न्यायाधीशको नाम संवैधानिक परिषद्मा पठाएको थियो ।
सिफारिस सूचीमा कामु प्रधानन्यायाधीश सपना मल्ल प्रधानसहित न्यायाधीशहरू कुमार रेग्मी, हरि फुयाँल, तिलप्रसाद श्रेष्ठ, डा. नहकुल सुवेदी र डा. मनोज शर्मा रहेका थिए ।
तर परिषद्ले वरिष्ठताको आधारभन्दा बाहिर गएर चौथो वरीयताका शर्मा रोजेपछि न्यायालयभित्र नयाँ बहस सुरु भएको छ । हालसम्म प्रधानन्यायाधीश नियुक्तिमा वरिष्ठताको रोलक्रमलाई मुख्य आधार मान्ने अभ्यास रहँदै आएको थियो ।
यसअघि दीपकराज जोशीको नियुक्ति विवादमा परेका बेला पनि परिषद्ले वरिष्ठताकै आधारमा उनको नाम सिफारिस गरेको थियो । यद्यपि संसदीय सुनुवाइ समितिले नागरिकता र शैक्षिक प्रमाणपत्रसम्बन्धी विवाद देखाउँदै उनलाई अस्वीकृत गरेको थियो ।
डा. शर्माको सिफारिससँगै अब प्रधानन्यायाधीश नियुक्तिमा ‘वरिष्ठता कि क्षमता’ भन्ने बहस पुनः सतहमा आएको छ ।
